32,8 x 12,4 cm (pregado) / 32,8 x 96 cm (despregado)

Publicación realizada para apoiar o proceso de restauración da toponimia galega, un fito histórico que, por primeira vez, permitiu que os nomes dos lugares tivesen carácter oficial na súa forma galega. Ademais do seu valor simbólico, supón un avance educativo fundamental ao conectar á cidadanía coa súa historia e co territorio.
O documento denuncia os atrancos que este proceso atopaba en certos concellos, especialmente na Coruña, onde o incumprimento da lei —que establece que “os topónimos de Galicia terán como única forma oficial a galega”— impedía a normalización lingüística. A publicación reclamaba serenidade, respecto e tolerancia, así como a recuperación oficial do nome galego da cidade e a incorporación do idioma aos servizos municipais.
O deseño gráfico correu a cargo de Pepe Barro, Xosé Salgado e Lía Santana (Grupo Revisión). O cartel, creado por Pepe Barro, parte da idea dunha gran A de A Coruña, representada como un estandarte que protexe e ilumina a palabra Coruña e, de maneira simbólica, a cidade.